كيف اسمعك ، وكيف تسمعني ؟؟

موضوع مرره خطير ونحتآجهـ



آستمتعوا, واستفيدوا









- أهلاً هنَو .. كيفك ؟ ايش اخبارك ؟ ..
* هلا فيك .. مااشي الحال .

- كأن فيك شي ؟
* لاا .. ابدا ..


- علي انا !
* .. هو شي بينرفزك .. ماودي اتكلم .

- ماني متنرفزة .. يللا عااد قولي
* مها امس دقت

- يااالله .. ذا البنت ترا مايجي منها الا المصاايب .
* مو كذاا هي كلمتني تقولي ...

- اقوول لو انا منك كان من اول تاركتها .. اعوذ بالله منها
* بس هي ماسوتلي شي هالمره . دقت تسلم وتسأل عن اخباري .. مادري حسيت من صوتها انها متغيره عن اول قلبي متطمن من ناحيتها

- ادري عارفة وش تحسين فيه . قد صارلي انا وعنود نفس الشي
* اقولك حتى طريقتها في الكـ ...

- احسن حل تطنشينها ولا تعطينها وجه مسويه تضحك عليك
* اففف .. طيب

- صدقيني ابي اساعدك يانورة .. تدرين ذا البنت وش كثر تكرهنا وتحقد علينا وانتي الوحيده اللي .......... الخ



أعمق احتياجاتنا .. انه احد يسمعنا ويفهمنا ..
يحس فينا لما نتكلم .. يحتوينا .. ويريحنا من همومنا ..
أياً كان هالشخص .. صاحبه , اخت , ام , اب , زوج , أخ ...
بمجرد انه يسمعلك ويهتم باللي تقوليه .. ويأشرلك براسه انه فاهمك .. ويسكت للنهاية
من بعدها .. بتكوني ممتنة كل الامتنان لهالانسان ..
أنا وانتي ماراح نتجرأ ونفتح قلبنا لأي أحد .. الا اذا حسينا بحب وتفهم حقيقي من الطرف الثاني ..
ولما نلقى الامان عند شخص بنتكلم أكثر وأكثر من اللي متوقع يسمعه .

هدفي .,
نقتدي برسولنا محمد – صلى الله عليه وسلم – ونتعلم آداب الحوار والإنصات .
روى الطبراني بإسناد صحيح عن عمر بن العاص رضي الله عنه قال:
" كان رسول الله صلى الله عليه وسلم يقبل بوجهه وحديثه على شر القوم ، يتألفه بذلك، وكان يقبل بوجهه وحديثه عليّ حتى ظننت أني خير القوم."

محتوى الموضوع .,
من الحين أقولك .. مش حتقدري تغمضي عينيكي




ايش اكثر شي يرفع ضغطك وانتي تسولفي
؟؟
انزلي تحت وشوفي بنفسك !







خلينا صريحين مع بعض لما أحد يكلمك .. يا إما تكوني سرحانة بعيـد , ولا تتابعي المسلسل وموفاضيتله



ولا جالسه عالنت , ولا متنحة في وجهه وتفكري في شي ثاني ..


عشان مانظلمك أكيد أوقات كثيرة تعطيه كامل انتباهك و تركزي معاه ..


بس هنا بموضوعنا بنركز عالجانب السلبي ونشوف أسوأ أنواع الإنصات عشان نتجنبها .

:

1- التحليـق بعيداً
- مااقلتلك رحت البازاار يوم الخميس .. يالله مرره مرره يجنن . جايبين بروشات اوول مرره اشوفها فخممه .. وتقدرين تطلبين منها تسوي أي تصميم لو ودك ..
* يااسرياااااتي وين الشاااهي ؟ اقول هند روحي شوفي هذي وينها وجيبيلي جوالي في الطريق ..
- خييير اكلم نفسي انا !
* هاه ! .. تكلميني .؟
- اااااااااااااه وانا من الصبح اكلم مييين ؟ انقلعي اللي تقولك سالفه مرره ثانية .
* مانتبهتلك والله

( هذا النوع أكثر شي يكرهك في النااااااس .. اللي قدامك تكون سرحااانه وانتي من كل قلبك تحكين السالفة آخرتها تقولك مانتبهت ! .. حلوها انتوا ! )


:

2- التظاهر بالإنصات
- شفتي وش سويينا اليوم في أبله صبحية ؟ انااا و هيااا هبللنا فيييييييهاا
صدق
- ايييه , رغدة جاابت سلحفاة وصمغتهاا على كرسيهاا .. المهم كااانت تهااوش تهااااوش ومعصصصبه جلست عليهاااا وفغصتهااا . وكلللناا فقعناا ضحك
* امممم
- هيييه . مانتي معااي .
* الا اسمع


<<< انا واختي >_< وش اسويلها مااتسولف الا اذا شافتني عالنت .
( التظاهر بالانصات يعني تسوين نفسك تسمعين وانتي مانتي يمها على قولتهم )

:


3- الإنصات الإنتقائي .
- اليوم قعدت افكر في العيال . يختي هالمدارس الاهلية مااش . موب زي الحكومية أبد .
* ذكرتيني على طاري العيال .. يختي احترت وش البسهم في عزيمة أم ابتهال .. يوم اقول بلبسهم عاادي ويوم اقول لاا . لازم لبس كشخة بس ياخوفي يعدمونه باللعب .

( الانصات الانتقائي . هو اللي تاخذين من اللي تسمعينه الكلمة اللي تهمك وتطنشين الباقي .. مرره حركة تقهر )

:

4- الإنصات للكلمات .
الإنصات للكلمات يعني تسمعي الكلمات بس بدون ماتشعري بمضمونها . مثلاً :
تقولك صاحبتك ونبرتها شوي حزينة : " ايش رايك في منى ؟ " .
وانتي تجاوبي : " ياحبيــلها تهبل "
بس لو حسيتي بنبرتها وشعورها بتعرفي انه في شي مو تمام . وبكذا تجاوبي : " ماعليها .. ليه ضايقتك بشي ؟ "
( اذا ركزتي على الكلمات .. ماراح تفهمي المشاعر . لازم كلمات ومشاعر سوا )

:

5- الإنصات المرتكز على الذات .
* يالله جايني اكتئااب , أحس اني ضاايعه من بعد ماخلصت جامعه .
- انتي جايك اكتئاب ؟ بس عشان خلصتي جامعه ! أجل لو اقولك وش صارلي عشان تعرفين الاكتئاب مزبوط أنا ياحبيبتي لي شهرين وانا … الخ

الانصات المرتكز على الذات يعني اللي قدامك لما تحكيه عن موقف صارلك ..علطول بيقولك.. أنا و أنا.. ويحكيك عن مواقف له ولايهتم فيك ..
يركز على نفسه وبس ويبدأ عاد يقولك قصة حياته .
وإذا عارضتي كلامه .. ياسااتر
هذا الحوار يكون فيه منافسة كل واحد بيهزم الثاني بكلامه ..

:

6- إصدار الأحكام .
واحنا نسمع لأشخاص ممكن جوا عقلنا نصدر أحكام عليهم وعلى اللي يقولونه .
اذا كنتي تنشغلي بالأحكام .. يعني انتي أصلاً ماتسمعي شي ! ..
تابعي هالحوار -الأحكام بين قوسين - .

- قاعدة أفكر أتخصص إدارة مالية .
* والله! ( قبل أمس كنتي تسبين في هالمالية )
- ايه . سمعت في برنامج يقول إن مجالها الوظيفي أوسع من إدارة الأعمال .
* أماا ( وانتي كل ماسمعتي أحد صدقتيه )
* عاد انتي من أول ودَك في إدارة أعمال . ( والله انك خبلة لو غيرتي رأيك )
- كلمت تهاني اللي في البنك مرره مدحته لي وتقول فرصة ماتتعوض للبنات .
* اللي يعجبك ادخليه (غثيتيني بهالساالفه ) .


:

7- تقديم النصائح
- الدكتورات في القسم حقي مرررة يسدون النفس . تعاملهم زي الزفت .
* يوم كنت قدك وانا ادرس في الكلية كانوا يحقرون دفعتنا كنا صغار ومانعرف شي في الجامعه وهم دايما يحطمونا.
بس تحديت نفسي وسرت أشارك في المحاضرة وخليتهم يحفظون اسمي من كثر ما أسألهم .
- يا يمه أحسهم شايفين نفسهم . يعني مايعطونا وجه حتى لو رحنالهم . هذاك اليوم سألتها عن الـ ..
* ياابنتي , الجامعه عالم ثاني لازم تنطلين وجهك في كل مكان مااعلييه خلها تهاوشك و تسفل فيك أهم شي انها تعرفك ..

(تقديم النصائح .. يكون من أهلنا أو اللي أكبر مننا , هم يبغوا يفيدونا من خبرتهم . لكن أحنا كل اللي نبيه أنهم يسمعونا وبس . )

:


8- الإستجواب
- أهلاً حبيبي كيفك ؟
* الحمدلله .
- كيف الدوام اليوم إن شاء الله ماتعبت ؟
* لا ماتعبت .
- المدير قالك شي عن المشروع ؟
* لا
- غريبة !! ... هو طلبه منك أمس ؟
* ايه .
- انت قلتله انك تشتغل عليه ؟
* ايه
- لااازم تقوله لايحط احد بدالك , ماقابلته اليوم ؟
* نورة خلااااص تراني تعباان مالي خلق اتكلم
- ليش تهاوشني هذا وانا شايلة همك


(الاستجواب يصير لما واحد يسألك في وقت انت ماتبغى تتكلم فيه ويسألك سؤال ورا سؤال .
اذا يوم حسيتي أنك تسألي زوجك أو شخص ثاني .. وكان الجواب مختصر أو مارد عليك
اعرفي انك تسوين استجواب . الناس أوقات تحس انها مو مستعده للكلام.. اتركيه فترة بعدين اسمعيله وقت مايرتاح . )



ما أظن تبغي تكوني زي الناس اللي فوق ! تعالي نسير أحسن منهم ..